گھریلو تنازعہ پر خواتین سمیت ایک ہی خاندان کے پانچ افراد قتل

ڈیر ہ اسماعیل خان(این این آئی)پنیالہ کے علاقہ رحمانی خیل میں گھریلو تنازعہ پر خواتین سمیت ایک ہی خاندان کے پانچ افراد کوقتل کردیاگیا، ورثاء نے لاشیں سی پیک روڈ پر رکھ کر احتجاجی مظاہرہ کیااور روڈ کو ٹریفک کیلئے بند کردیا۔ تفصیلات کے مطابق پنیالہ کے علاقہ رحمانی خیل میں گھریلو تنازعہ پر شوہر نے نامعلوم جوہات کی بناء پر اپنی حاملہ بیوی کو قتل کردیا۔

بعد ازاں مقتولہ کے بھائیوں نے طیش میں آکر بہنوئی کے گھر جا کر اس کے والد، والدہ اور بہن کو قتل کر دیااور موقع سے فرار ہوگئے،جاں بحق افراد کے ورثاء نے لاشوں کو سی پیک روڈ پر رکھ کر احتجاج شروع کر دیا اور سی پیک روڈ کو ہر قسم کی ٹریفک کیلئے بند کر دیا۔تاہم آخری اطلاعات تک پولیس کی جانب سے روڈ کھلوانے کیلئے مظاہرین سے مذکرات جاری تھے۔