ڈالر کی قدر میں ہفتہ وار بنیادوں پر نمایاں کمی ریکارڈ

کراچی(این این آئی)پاکستانی روپے کے مقابلے انٹر بینک اور اوپن بینک مارکیٹ میں مسلسل کمی کا رجحان برقرار ہے۔تفصیلات کے مطابق زرمبادلہ مارکیٹ میں روپیہ آہستہ آہستہ مضبوط ہو رہا ہے، اور روپے کی قدر میں بتدریج اضافہ ہونے لگا ہے، گزشتہ ایک ہفتے کے دوران انٹر بینک میں ڈالر 60 پیسے سستا ہوا۔اسٹیٹ بینک کے مطابق انٹربینک میں ایک ہفتے کے دوران ڈالر 283 روپے 87 پیسے سے کم ہو کر 283 روپے 26 پیسے پر بند ہوا۔ دوسری جانب ایک ہفتے کے دوران اوپن مارکیٹ میں ڈالر میں مجموعی طور پر استحکام رہا۔

خیال رہے کہ گزشتہ سے پیوستہ ہفتے کے دوران بھی انٹربینک میں ڈالر کی قدر میں 9 پیسے جبکہ اوپن مارکیٹ میں ڈالر 286 روپے سے کم ہو کر 284 روہے 75 پیسے کا ہوگیا تھا۔یہ بات قابل ذکر ہے کہ 10 دسمبر کو چیئرمین پاکستان فاریکس ایکسچینج ایسوسی ایشن ملک بوستان نے ڈالر کی قیمت مزید گرنے کی پیش گوئی کرتے ہوئے کہا تھاکی مستقبل میں ڈالر 260 سے 250 کے درمیان آسکتا ہے۔ ملک بوستان کی جانب سے بیان میں کہا گیا ہے کہ آئی ایم ایف سے رقم جلد مل جائے گی جس کے بعد ڈالر مزید گرے گا اور مستقبل میں ڈالر 260 سے 250 کے درمیان آسکتا ہے۔