شندور پولو فیسٹول مسلسل چھٹی بار چترال کے نام

1 month ago 29

چترال: شندور پولو فیسٹول مسلسل چھٹی بار چترال نے جیت لیا۔

تفصیلات کے مطابق خیبر پختون خوا کلچر اینڈ ٹورازم اتھارٹی، ہیڈ کوارٹر الیون کور پشاور، فرنٹیئر کور نارتھ، اور ضلعی انتظامیہ اپر چترال کے تعاون سے 3 روزہ پولو فیسٹول کی رنگارنگ تقریبات چترال کی جیت کے ساتھ اختتام پذیر ہوگئیں۔

سطح سمندر سے 12 ہزار سے زائد فٹ بلندی پر واقع وادئ شندور کے خوب صورت میدان میں کھیلے گئے فائنل میں چترال کی ٹیم نے دل چسپ مقابلے کے بعد گلگت بلتستان کی ٹیم کو 9 کے مقابلے میں 10 گول سے شکست دے کر ٹرافی ایک بار پھر چترال کے نام کر دی۔

چترال کی ٹیم مسلسل چھٹی بار پولو فیسٹول کی فاتح قرار پائی ہے، شندور پولو فیسٹول میں چترال اور گلگت بلتستان کی 11 ٹیموں کے درمیان مقابلے تین روز تک جاری رہے، فائنل میں چترال اے کی ٹیم کا ٹاکرا گلگت بلتستان اے کی ٹیم کے ساتھ تھا، جس میں چترال اے کی ٹیم نے میدان مار لیا۔

اختتامی تقریب کے موقع پر پاکستان آرمی فزیکل ٹریننگ اسکول ایبٹ آباد کے پیراگلائیڈر، پاکستان آرمی کے ایس ایس جی کمانڈوز نے پیرا ٹروپنگ (پیرا جمپنگ) کی شان دار پرفارمنس کا مظاہرہ پیش کیا، جب کہ بچوں نے ملی نغمے اور کیلاش وادی کے مرد و خواتین نے روایتی رقص پیش کیا۔

واضح رہے کہ شندور پولو فیسٹول دیکھنے کے لیے ملکی سیاحوں کے ساتھ غیر ملکی سیاح بھی ذوق و شوق سے آتے ہیں، جن کے لیے تین دن وادئ شندور میں ٹینٹ ویلج قائم کیا جاتا ہے، کیوں کہ شندور میں ہوٹل کی سہولت موجود نہیں ہے۔

اگر آپ شندور میں رات گزارنا چاہتے ہیں تو آپ ٹینٹ ہی میں رات گزاریں گے، اس لیے فیسٹول شروع ہونے سے ایک دن پہلے وہاں پر محکمہ سیاست خیبر پختون خوا کی جانب سے ٹینٹ ویلج قائم کیا جاتا ہے، جہاں پر کھلاڑی اور سیاح تین دن قیام کر کے فیسٹول سے محظوظ ہوتے ہیں۔

پولو فیسٹیول کے دوران مقامی افراد کی جانب سے کھانے پینے کی اشیا، کپڑے، ٹینٹ اور دیگر چیزوں کا بازار بھی قائم کیا جاتا ہے۔

Comments

Read Entire Article