سیف اللہ ابڑو کا لیاقت جتوئی کو قانونی نوٹس بھیجنے کا اعلان

2 days ago 4

کراچی: پاکستان تحریک انصاف کے رہنما سیف اللہ ابڑو نے اپنی پارٹی کے رہنما لیاقت علی جتوئی کو قانونی نوٹس بھیجنے کا اعلان کر دیا ہے۔

تفصیلات کے مطابق پارٹی سے سینیٹ ٹکٹ خریدنے کے الزام پر سیف اللہ ابڑو نے لیاقت جتوئی کے خلاف قانونی چارہ جوئی کا اعلان کیا ہے، انھوں نے کہا اب عدالت میں ملاقات ہوگی۔

سیف اللہ ابڑو نے ایک ویڈیو بیان میں کہا آج لیاقت جتوئی نے مجھ پر بے بنیاد الزامات لگائے ہیں، لیاقت جتوئی کو مخاطب کرتے ہوئے انھوں نے کہا خان بہادر آپ نے کہا ہے کہ میں نے 35 کروڑ روپے دے کر سینیٹ ٹکٹ لیا، آپ کو اخلاقیات کا پتا ہی نہیں ہے۔

پی ٹی آئی کے سینیٹ امیدوار سیف اللہ ابڑو نے کہا کہ کتنے دنوں سے آپ لوگ میرے خلاف لابنگ کر رہے ہیں، آج آپ کو قانونی نوٹس بھجوا رہا ہوں، اب ملاقات عدالت میں ہوگی۔

انھوں نے ویڈیو بیان میں کہا کہ لیاقت جتوئی نے جو الزامات مجھ پر لگائے ہیں عدالت میں اس کے لیے جواب دینا پڑے گا۔

لیاقت جتوئی کا اپنی ہی جماعت پر سینیٹ ٹکٹ فروخت کرنے کا الزام، شہباز گل کا ردِ عمل

واضح رہے کہ آج پی ٹی آئی رہنما لیاقت جتوئی نے اپنی ہی جماعت پر سینیٹ ٹکٹ فروخت کرنے کا الزام لگایا تھا، انھوں نے دعویٰ کیا کہ سیف اللہ ابڑو کو سینیٹ ٹکٹ بیچا گیا ہے۔

لیاقت جتوئی نے کہا گورنر ہاؤس کے ڈرائنگ روم کے فیصلے پارٹی کے لیے نقصان دہ ہیں، پیراٹروپر سیف اللہ ابڑو کو 35 کروڑ میں سینیٹ ٹکٹ بیچا گیا، کراچی میں بیٹھے چند افراد فیصلہ کرتے ہیں، جو نقصان دہ ہے۔

خیال رہے کہ لیاقت علی جتوئی نے ایک ایسا دعویٰ کر دیا ہے جس کے خاتمے کے لیے پی ٹی آئی جدوجہد میں لگی ہوئی ہے، جس کے تحت سینیٹ میں امیدواروں کی خرید و فروخت کو روکنے کے لیے اوپن بیلٹ انتخاب کا طریقہ کار لایا جا رہا ہے۔

Comments

Read Entire Article