2 days ago
9
کراچی : ایم کیوایم پاکستان کے کنوینئر خالد مقبول صدیقی نے کہا ہے کہ پاکستان میں صرف دو قومیتیں آباد ہیں ایک ظالم دوسرا مظلوم، ہم اب ہر ظلم کیخلاف مزاحمت کریں گے۔
یہ بات انہوں نے کراچی میں متحدہ قومی موومنٹ پاکستان کے39ویں یوم تاسیس کے موقع پر جلسہ عام سے خطاب کرتے ہوئے کہی، انہوں نے کہا کہ پاکستان کے غریبوں اور مظلوموں کو ایک پرچم تلے جمع کریں گے۔
انہوں نے کہا کہ سوال یہ ہے کیا ہم پاکستان بنانے کا مقصد حاصل کرچکےہیں؟ ہم نے آزادی حاصل کرنے کی قدر نہیں کی، لاکھوں، کروڑوں لوگوں نے تاریخ کی سب سے بڑی ہجرت کی تھی، اب ایم کیوایم پاکستان ہر ظلم کے خلاف مزاحمت کرے گی۔
خالد مقبول نے کہا کہ آج کراچی نے پورے پاکستان کو پیغام دے دیا ہے کہ پاکستان بنانے والوں کی اولادوں کو پاکستان بچانے کا وعدہ نبھانا پڑا، اگر 75سال بعد بھی عوام اپنے مقدر پرخوش ہیں تو پھر کچھ نہیں بدلنے والا۔
ایم کیوایم پاکستان کے کنوینئر نے کہا کہ پاکستان کے بسنے والوں کی نمائندگی یہاں موجود ہے، اس ملک میں دو طرح کے لوگ ہیں ایک حاکم اور دوسرا محکوم، تمام محکوم ایک آوازہوکر اور ایک پرچم تلے جمع ہوکراپنی جدوجہد کریں گے۔
ان کا کہنا تھا کہ طاقت ہماری تہذیب نہیں بلکہ تہذیب ہماری طاقت ہے، قوم کو غلامی سے بچانےکیلئے ایک نئی اور تازہ جدوجہدکا آغازکرنا ہے، مظلوموں کیلئے کوئی بھی تحریک شروع ہوگی تو ایم کیوایم ساتھ دے گی۔
خالد مقبول صدیقی کا مزید کہنا تھا کہ لوگ ہم سے پوچھتے ہیں کہ آپ کا بیانیہ کیا ہے؟ تو میں بتاتا چلوں کہ ہماری 35سال کی تاریخ ہمارا بیانیہ ہے، ہمیں سب سے پہلے پاکستان کے غریبوں کو آئینی تحفظ فراہم کرنا ہے۔
باغ جناح کراچی میں ہونے والے جلسہ عام سے متحدہ قوممنٹ کے مصطفیٰ کمال، ڈاکٹر فاروق ستار، نسرین جلیل اور دیگر رہنماؤں نے بھی خطاب کیا۔
